БНХАУ: Олимпийг бойкотолсны хариуцлагыг АНУ-д хүлээлгэнэ

Бээжингийн өвлийн олимпод тавьсан дипломат бойкотын хариуцлагыг АНУ-д хүлээлгэхээ БНХАУ-ын Засгийн газар мэдэгдсэн байна. Австралийн засгийн газрын шийдвэрийг ч тус улс сайшаахгүй байгаа аж.

Гадаад хэргийн яамны хэвлэлийн төлөөлөгч Жао Лижиан “Буруу алхамынхаа хариуцлагыг АНУ хүлээх болно” хэмээн мэдэгджээ. Уг алхам нь “спортын салбарт төвийг баримтлах” зарчмыг зөрчсөн үйлдэл хэмээн буруутгаж байгаа аж.

Хүний эрхийн ноцтой зөрчил үйлдэж байгаагийн улмаас АНУ 2022 оны хоёрдугаар сард зохион байгуулагдах Бээжингийн өвлийн олимпод төр засгийн нэг ч төлөөлөгчөө илгээхгүй хэмээн мэдэгдсэн билээ. АНУ-ын тамирчид уг тэмцээнд хэвийн байдлаар оролцох юм байна. Цагаан ордны төлөөлөгчид энэхүү шийдвэрээ Шинжанд үйлдэгдэж буй хүний эрхийн зөрчилтэй холбон тайлбарласан байна. Тэнд БНХАУ-ыг исламын шашинт уйгар иргэдийн эсрэг “төрлөөр устгах, хүн төрөлхтний эсрэг ноцтой гэмт хэрэг” үйлдэж байна хэмээн буруутгаж буй аж.

Австрали, Шинэ Зеланд, Их Британи зэрэг орнуудын төр засаг ч АНУ-ын энэхүү шийдвэрт нэгдээд байгаа аж. Энэхүү хөдөлгөөнд нэгдэх орны тоо цаашид нэмэгдэх эсэх нь тодорхойгүй байна. Францын засгийн газар Европын Холбооны орнууд нэгдмэл байр суурьтайгаар уг асуудалд хандах ёстой гэж үзэж байна.

ОХУ америкийн төр засгийн уг шийдвэрт шүүмжлэлтэй байр сууринаас хандаж буй аж. Кремлийн төлөөлөгч Дмитрий Песков “Олимпийн тоглолт нь улс төрийн нөлөөнөөс ангид байх ёстой” хэмээн мэдэгджээ.

Олон улсын олимпийн хороо (ОУОХ) АНУ-ын байр суурийг хүндэлж байгаагаа илэрхийлсэн. Тус хорооны ерөнхийлөгч Томас Бах уг маргааныг “цэвэр улс төрийн маргаан” хэмээн тодорхойлсон. Ийм ч үүднээс ОУОХ уг асуудалд ямар нэгэн байр суурь илэрхийлэхгүй гэсэн байна.

Эх сурвалж: dw.com